#EdoDecides2024: Gwamna Obaseki ya ce PDP ce za ta lashe zaɓen jihar in dai babu wanda ya yi magudi  

Daga Sabiu Abdullahi  

Gwamnan jihar Edo, Godwin Obaseki, ya kada kuri’arsa a makarantar firamare ta Emokpa da ke unguwar Oredo Ward 4, Rumfa ta 19, da misalin karfe 11:55 na safe a yayin da ake gudanar da zaben gwamna.  

Da yake bayyana babu hayaniya a wajen zaɓen zuwa wannan lokacin, Obaseki ya bayyana fatansa na ganin jam’iyyarsa ta samu nasara.   

“Ina da yakinin dan takarar jam’iyyarmu zai lashe zaben idan ba a yi magudin zabe ba,” inji shi.

Gwamnan ya kara da cewa, “Daga rahoton da muke samu tun daga lokacin ya nuna cewa ana gudanar da zaɓen cikin lumana, ba mu samu wani mummunan labari ba kawo yanzu.”

A halin da ake ciki, dan takarar jam’iyyar Labour Party (LP), Olumide Akpata, shi ma ya bayyana gamsuwa da yadda aka gudanar da zaben.

Bayan ya kada kuri’arsa a rumfar zabe mai lamba 11, Ward 6 a karamar hukumar Oredo da misalin karfe 10:30 na safe, Akpata ya bayyana fatan ganin an gudanar da zaɓen cikin lumana a fadin jihar.  

Ya yi kira da a bar magoya bayansa su kada kuri’unsu ba tare da cikas ba.  

Duk da ruwan sama da aka fara yi da misalin karfe 10 na safe, jama’a sun fito da dama, inda suka nuna aniyarsu ta shiga harkokin zaben.

Maudu'ai Masu Alaƙa:

Za mu riƙa biyan N70,000 a matsayin mafi ƙarancin albashi a Edo—Obaseki Kotun ɗaukaka ƙara za ta saurari ƙarar Gwamnan Kano Abba da Gawuna ranar Litinin Masanin adabi Soyinka ya yi Allah-wadai da hare-haren da ake kai wa masu zanga-zanga da ‘yan jarida Yadda matasa a Jihar Yobe ke ƙoƙarin yi wa ‘yan majalisu 3 kiranye