Za mu sauya wa NYSC fasali —Minista
Karamin Ministan Cigaban Matasa, Ayodele Olawande, ya ce ana shirin sake fasalin hukumar yi wa kasa hidima (NYSC) domin ba da gudummawar ci gaban tattalin arzikin kasa.
Ya bayyana hakan ne a lokacin da yake zantawa da rukunin masu bautar ƙasa na 2023 (Batch C Stream 2) a ziyarar da ya kai sansanin NYSC Orientation a karamar hukumar Paiko a jihar Neja.
Mista Olawande ya yi alkawarin sauya al’amura ga masu bautar kasar.
“A matsayinmu na matasa, wannan lokaci ne da za mu yi tunani, shugaban kasa ya ba mu dandamali; yanzu ya rage mana don yin amfani da dandalin.
“Ya kamata matasa su shiga kuma su canza al’amuran, a matsayinku na masu hidima, ku dauki shirye-shiryen koyon sana’o’i da mahimmanci don samun kwarewa don inganta rayuwarku,” in ji shi.
Tun da farko dai, Abdulwahab Olayinka, Ko’odinetan NYSC a Nijar, ya bayyana cewa an yi wa masu yi wa kasa hidima 1,912 rajista, wadanda suka hada da wadanda aka tura Neja da wadanda aka kora daga FCT.
Ya ce sansanin na fuskantar kalubale da rashin isasshen wurin kwana ga mambobin kungiyar da jami’an sansanin da kuma sauran kayayyakin sansanin.
