Yajin aiki ya sa an rufe ƙofofin zauren majalisun Najeriya

Daga Sabiu Abdullahi

Ginin majalisu a Najeriya da ke Abuja suna rufe yayin ƙungiyoyin ƙwadago suka shiga yajin aiki

Idan dai za a iya tunawa, kungiyar Kwadago ta Najeriya da kungiyar ‘yan kasuwa sun sanar da fara yajin aikin sai baba-ta-gani a faɗin kasar daga yau Talata duk da umarnin da kotu ta bayar na hana kungiyoyin yin hakan.

Rahotannin sun nuna cewa a makon da ya gabata kungiyar ƙwadagon ta fitar da sanarwar yajin aikin a faɗin kasar sakamakon wani hari da aka kai wa Joe Ajaero, shugaban kungiyar NLC, a ranar 1 ga Nuwamba, 2023, a jihar Imo.

Da misalin karfe 12:23 na daren ranar Talata lokacin da ƴan jarida suka ziyarci harabar majalisar, dukkanin kofofin da kai ga zuwa harabar majalisar na kulle da makulli.

An ga ma’aikata da dama sun maƙale a ƙofar shiga majalisar, sai dai wakilinmu ya ruwaito cewa, duk da kulle-kullen da aka yi, zaman majalisar na ci gaba da gudana a zauren majalisar har ya zuwa lokacin da wannan rahoto ya fito.

Maudu'ai Masu Alaƙa:

Majalisa ta ba da umurnin duba lamarin albashin malaman jami’o’i Ƴan sanda sun damƙe Ajaero shugaban ƙungiyar NLC Ba kama shugaban NLC muka yi ba, muna ba shi kariya ne—Ƴan sandan Imo Majalisa za ta binciki yadda manyan makarantun Najeriya ke ba da gurbin karatu bisa ka’ida ba