Xavi Ya Sanar Da Aniyarsa Ta Barin Barcelona A Ƙarshen Kakar Wasan Bana

Daga Sabiu Abdullahi

Kocin Barcelona Xavi Hernandez ya bayyana aniyarsa ta barin kungiyar a watan Yuni, wanda ya kawo karshen kakar wasa mai cike da kalubale.

Matakin ya biyo bayan gagarumin koma baya ne a lokacin da Barcelona ta sha kashi da ci 5-3 a hannun Villareal mai matsayi na 14 a teburin Laliga a daren Asabar.

Dan jaridar wasanni Fabrizio Romano ne ya bayyana hakan, inda ya ambato Xavi, wanda ya bayyana cewa, “Mun kai matsayin da ba za a sake dawowa ba, lokaci ya yi da za a yi sauyi, ina ganin lokaci ya yi da zan tafi, na yi magana da jagororin kungiyar zan tafi ranar 30 ga watan Yuni.”

Xavi, wanda ya yi fice a tarihin Barcelona, ya shafe shekaru 17 a matsayin dan wasa, inda ya ba da gudummawa a wasanni 767, ya kuma lashe kofuna 25, ciki har da kofunan lig guda takwas da na gasar zakarun Turai hudu.

Maudu'ai Masu Alaƙa:

Barcelona za ta yi bincike kan cin zarafin da magoya bayanta suka yi wa Vinicius Babban Ɗan Ƙwallon Da Bai Taɓa Samun Katin Gargaɗi Ko Jan Kati Ba Jinya za ta hana Bellingham buga wasu wasanni wa Madrid Vinicius ya taka rawar gani wa Madrid a wasansu da Osasuna