Wani Jirgin Sojoji Ya Yi Sanadin Mutuwar Mutane Da Dama A Zamfara

Daga Sabiu Abdullahi

Rahotanni daga garin Tungar Kara, cikin ƙaramar hukumar Maradun ta jihar Zamfara, sun bayyana cewa wani jirgin sama da ake zargin na sojoji ne ya yi kuskuren barin wuta kan wasu ƴan sa kai da mazauna gari, lamarin da ya yi sanadin mutuwar mutane da dama a yammacin Asabar.

An ce harin ya faru ne yayin da ƴan sa kai suke ƙoƙarin dakile wani hari da ƴan bindiga suka kai garin, suna ƙoƙarin kore wasu dabbobi.

Wani mazaunin garin, wanda ya rasa ɗan yayansa a harin, ya ce: “Ƴan sa kai da dama sun mutu yayin da suke yunƙurin tunkarar ƴan bindiga. Amma ƴan bindigan sun riga sun fice daga yankin kafin jirgin ya fara barin wuta. Waɗannan yaran da mutane ne da ke ƙasa jirgin ya harba. Yanzu haka ɗan yayana an kawo mun shi a mace.”

Mutumin ya ƙara da cewa mutane aƙalla 20 ne suka rasa rayukansu a wannan hari.

Jami’in watsa labarai na rundunar Operation Hadarin Daji, Laftanar Kanar Abubakar Abdullahi, ya ce zai bincika lamarin kuma ya bayar da karin bayani nan gaba. Hakazalika, mai magana da yawun gwamnan jihar, Sulaiman Bala Idris, ya tabbatar da cewa suna duba lamarin.

Harin ya bar mutane cikin tashin hankali da damuwa, musamman ma ganin cewa waɗanda aka kashe sun kasance wajen yunƙurin kare garin daga ƴan bindiga.

Maudu'ai Masu Alaƙa:

Yanzu-yanzu: Gwamnatin Zamfara ta dakatar da lasisin makarantu masu zaman kansu ABIN TAUSAYI: An yanke wa wata yarinya ƴar shekara 13 hannu mai suna Fauziyya Sani sakamakon rashin kuɗin kai ta asibiti a jihar Zamfara AKWAI RINA A KABA: Kotu ta ayyana zaɓen gwamnam Zamfara a matsayin wanda bai kammala ba ‘Ƴan bindiga sun sace fiye da mutum 100 a Zamfara’