Tinubu ya rantsar da Kekere-Ekun a matsayin sabuwar Alƙaliyar Alƙalai

Daga Sabiu Abdullahi

A yau ne Shugaban Nijeriya, Bola Tinubu ya rantsar da Mai Shari’a Kudirat Kekere-Ekun a matsayin sabuwar Alƙaliyar Alƙalan ƙasar ta riƙo, kafin Majalisar Dattawan ƙasar ta tabbatar da naɗin nata.

An naɗa ta a kan muƙamin ne bayan Alƙalin Alƙalan ƙasar Olukayode Ariwoola ya yi ritaya a jiya Alhamis.

Wace ce Kudirat?

An haifi Kudirat Motonmori Olatokunbo (CFR) a ranar 7 ga watan Mayun 1958 a birnin London da ke ƙasar Birtaniya.

Sannan an fi saninta da Kudirat Kekere-Ekun.

Ƙwararriyar lauya ce a Najeriya kuma mai shari’a ta Kotun Koli ta Najeriya.

A shekarar 1980, ta kammala digirinta na farko a fannin shari’a daga Jami’ar Legas, kuma ta samu gurbin karatu a Nigerian Bar a ranar 10 ga Yuli 1981, bayan ta kammala makarantar koyon aikin lauya ta Najeriya.

Daga bisani ta wuce Makarantar Tattalin Arziki ta London inda ta samu digiri na biyu a fannin shari’a a watan Nuwamba 1983.

Maudu'ai Masu Alaƙa:

Tinubu ya naɗa sabon shugaban EFCC Da ɗumi-ɗumi: Kotun Ƙoli ta yi watsi da buƙatar Atiku ta soke zaɓen Tinubu “Ba za ka mayar da mu baya ba”—kotu ta faɗa wa Atiku Abubakar Shahararren mawaƙin siyasa Rarara ya ce Buhari ne ya lalata Najeriya ba Tinubu ba