Shugaba Tinubu da Sarki Charles na Birtaniya sun gana a karon farko

Daga Sabiu Abdullahi

Shugaba Bola Tinubu ya gana da Sarkin Birtaniya, Sarki Charles na III, a taron COP28 da aka yi a Dubai, Haɗaɗɗiyar Daular Larabawa (HDL).

Tinubu ya tura hotunan taron ne a shafinsa na Instagram a ranar Alhamis, inda ya bayyana cewa taron na da azamar ƙarfafa alaƙa tsakanin ƙasashen biyu.

An yi wa hotunan taken, “Na yi wata ganawa mai gamsarwa tare da Mai Martaba, Sarki Charles na III na Ingila wanda kuma shi ne Shugaban Commonwealth.

“Taron wani muhimmin mataki ne na ƙarfafa haɗin gwiwa tsakanin Najeriya da Birtaniya, kuma ina da ƙwarin gwiwa game da kyakkyawan tasirin da ƙoƙarin haɗin gwiwarmu zai yi kan makomar duniyarmu a yayin da muke fatan samar da daidaito a duniya wajen kula da muhalli.”

Shugabannin biyu sun tattauna batutuwa da dama da suka haɗa da sauyin yanayi, kasuwanci, da zuba jari.

Sun kuma amince da yin aiki tare domin ƙarfafa alaƙar da ke tsakanin ƙasashensu.

Ganawar ita ce ta farko tsakanin Tinubu da Sarki Charles na III tun bayan da Tinubu ya hau mulki a watan Mayu.

Maudu'ai Masu Alaƙa:

Tinubu ya naɗa sabon shugaban EFCC Da ɗumi-ɗumi: Kotun Ƙoli ta yi watsi da buƙatar Atiku ta soke zaɓen Tinubu “Ba za ka mayar da mu baya ba”—kotu ta faɗa wa Atiku Abubakar Shahararren mawaƙin siyasa Rarara ya ce Buhari ne ya lalata Najeriya ba Tinubu ba