‘Saboda Allah na dawo da $10,000 da na tsinta a jirgi,’ cewar ma’aikacin filin jirgi da ya yi tsintuwa a Kano

Daga Sabiu Abdullahi  

Wani ma’aikaci a filin jirgin sama na Malam Aminu Kano da ke Kano, Auwalu Ahmed Dankade, ya mayar da dala 10,000 da ya samu a lokacin da yake sharar jirgin.  

Adadin kuɗin, wanda ya kai kusan N15m, an gano shi ne a ranar Laraba da rana a cikin wani jirgin kasar Masar.  

A wata hira da jaridar Daily Trust ta Najeriya ta wayar tarho, Dankade ya ce, “An horar da ni cewa kada in dauki abin da ba nawa ba, duk wani abu da ka dauka ba bisa ka’ida ba, za a yi maka hisabi a Lahira.”

Ya danganta abin da ya yi da tarbiyyar da ya samu, inda yake cewa, “Iyayena sun koya mana mu gamsu da duk abin da muke da shi, kuma wannan tarbiyya ta sa na dawo da kuɗin cikin sauki.”  

Maudu'ai Masu Alaƙa:

Wata mata ta sayar da jikanta Matashi ya kashe ɗan maƙwabcinsa mai shekara 5 Shahararren mawaƙin siyasa Rarara ya ce Buhari ne ya lalata Najeriya ba Tinubu ba Tinubu ya gana da tsohon shugaban ƙasa Jonathan a Abuja