Mummunar Gobara Ta Tashi a Kasuwannin Ladipo da Owode Onirin a Legas

Gobara ta tashi a shahararrun kasuwannin Ladipo da ke Mushin da Owode Onirin da ke kan titin Ikorodu a Legas, inda ta haddasa asarar miliyoyin naira.

Rahotanni sun bayyana cewa gobarar ta fara ne da tsakar daren Talata, inda ta bazu cikin shaguna da rumbunan ajiyar kaya. An bayyana cewa kayan da suka ƙone sun haɗa da injuna, kayayyakin gyaran motoci da babura, da kuma na’urorin lantarki na gida.

Daraktar hukumar kashe gobara ta jihar Legas, Margaret Adeseye, ta tabbatar da faruwar lamarin. Ta ce jami’an agajin gaggawa daga cibiyoyin kashe gobara na Isolo, Bolade, da Alausa sun hanzarta zuwa wurin domin shawo kan wutar, duk da ƙalubalen da suka fuskanta wajen isa yankunan.

A lokaci guda, wata gobara ta sake tashi a kasuwar Owode Onirin, inda ta ƙone shaguna da dama masu sayar da kayan ƙarafa. Jami’an kwana-kwana daga Alausa da Ikorodu sun isa wurin domin kashe wutar.

Adeseye ta tabbatar da cewa ba a samu asarar rayuka ba a gobarar biyu, kuma ana ci gaba da bincike domin gano musabbabin tashinsu.

Maudu'ai Masu Alaƙa:

Aikata Laifin Fyaɗe Ya Sa An Yi Wa Fasto Ɗaurin Rai-da-rai Shugaban jam’iyyar PDP ya shaƙi iskar ‘yanci daga hannun masu garkuwa da mutane
Ɗalibar jami’a ta rasa ranta a wajen masu garkuwa da ita Jami’an tsaro sun damƙe wanda ya yi garkuwa tare da hallaka ɗaliba a Legas