Mahara sun kashe wani makiyayi da shanu 50 a Filato

Daga Sabiu Abdullahi

Rahotanni sa ke fitowa daga Jihar Filato na nuna cewa ƴan bindiga a ranar Talata sun kashe wani makiyayi tare da shanu 50 da kuma tumakai a garin Fanzo dake ƙaramar hukumar Barikin Ladi.

Alhaji Dan-Azumi wanda ya rasa shanu 21 a harin ya tabbatar wa manema labarai cewa an jikkata ƙarin wani makiyayin lokacin da yake kiwo a lokacin.

An ambato shi yana cewa, “Ba zato ba tsammani ƴan bindigar suka farma yankin inda suka fara harbi. Sun kuma kashe ɗaya daga cikin makiyayan suka kuma jikkata wani. Ƴan bindigar sun kuma yi awon gaba da shanu sama da 50. Wasu daga ciki sun mutu a yayin da wasu suka samu raunin harsashi. Hari ne da aka ƙaddamar da shi babu gaira babu dalili.”

“Mu ƴan ƙasa ne masu bin doka  muna kira ga jami’an tsaro dake yankin da su gudanar da cikakken bincike tare da gurfanar da waɗanda suka aikata laifin gaban shari’a.Muna kuma kira ga jami’an tsaro da su ƙwato shanun da aka sace.”

Garba Abdullahi, shugaban ƙungiyar, Gan Allah Fulani Development Association (GAFDAN),  wanda shi ma ya tabbatar da faruwar lamarin ya yi kira ga jami’an tsaro da su nemo tare da kamo masu laifin a kuma hukunta su.

Maudu'ai Masu Alaƙa:

Ƴan bindiga sun hallaka manoma tare da yin garkuwa da wasu a Katsina Ƴan bindiga sun sace gwamman mutane a Taraba Adadin wadanda aka kashe a Filato ya haura 100—Rahoto Arangama Tsakanin Sojoji Da Ƴan Bindiga A Mangun Jihar Filato Ya Sanadin Mutuwar Mutum 30