Kotu Ta Yi Fatali Da Umarnin Soke Dawo da Sarki Sanusi

Daga Sabiu Abdullahi

Kotun Ɗaukaka Ƙara ta Kano ta yi watsi da hukuncin da Babbar Kotun Tarayya ta yanke na soke nadin Sanusi Lamido Sanusi a matsayin Sarkin Kano na 16.

Kwamitin alkalai uku na Kotun Ɗaukaka Ƙara, ƙarƙashin jagorancin Mai Shari’a Mohammed Mustapha, ya bayyana a hukuncinsa cewa hukuncin Babbar Kotun Tarayya ƙarƙashin Mai Shari’a Abubakar Liman na ranar 20 ga Yuni, 2024, bai cancanta ba.

Hukuncin da aka soke ya shafi dokar masarautar Kano ta 2024, wadda aka yi amfani da ita wajen sake nadin Sanusi.

A cewar Kotun Ɗaukaka Ƙara, Mai Shari’a Liman ya wuce huruminsa wajen soke matakin gwamnatin jihar Kano, wanda aka ɗauka bisa doka ta majalisar masarautu ta 2024.

Haka kuma, kotun ta bayyana cewa karar da Alhaji Aminu Babba Dan Agundi ya shigar, wadda Mai Shari’a Liman ya dogara da ita, ba ta da inganci.

Kotun ta ce rashin bin ka’idar shigar da ƙarar ya hana Babbar Kotun Tarayya hurumin yin shari’ar.

A gefe guda, Kotun Ɗaukaka Ƙarar ta bayar da umarnin sake duba ƙarar da Sarki Aminu Bayero ya shigar kan hukuncin tsige shi da Gwamna Yusuf ya yanke.

Kotun ta ce akwai hujjojin da suka nuna cewa ba a ba Sarki Bayero damar kare kansa a Babbar Kotun Jihar Kano ba, lamarin da ya sa Kotun Ɗaukaka Ƙarar ta bayyana cewa an gudanar da shari’ar cikin rashin adalci.

Maudu'ai Masu Alaƙa:

Yadda ake shirye-shiryen miƙa wa Sanusi II ragamar mulki Ƴan sandan Kano sun sha alwashin aiwatar da umarnin kotu da ya hana a dawo da Sanusi ‘Kotu ta hana musguna wa SLS’ Ganduje Ya Zama Shugaban APC Na Ƙasa