Gwamnatin Kano Ta Kafa Kwamitin Bincike Kan Ƙorafin Rage Albashi

Gwamnan Jihar Kano, Abba Kabir Yusuf, ya kafa kwamitin bincike kan koke-koken da wasu ma’aikatan jihar suka yi game da rashin biyan su cikakken albashi ko yanke musu hakki a watan Janairu.

A wata sanarwa da mai magana da yawun gwamnan, Sunusi Bature Dawakin Tofa, ya fitar a yau Alhamis, Abba Kabir ya bayyana lamarin a matsayin “take haƙƙin ma’aikata da cin amana ga jama’a.”

“Wannan gwamnati ba za ta lamunci rashin adalci ga ma’aikatanmu ba. Duk wanda aka samu da laifi zai fuskanci hukunci,” in ji sanarwar.

An umarci kwamitin da ya gudanar da bincike mai zurfi kan tsarin biyan albashi don gano ko matsalar na’ura ce ko kuma an aikata hakan da gangan, tare da bayar da shawarwarin matakin da ya dace.

Kwamitin, wanda ke ƙarƙashin jagorancin Kwamishinan Raya Karkara da Ci gaban Al’umma, Abdulkadir Abdussalam, ya ƙunshi jami’an gwamnati 10 da za su gudanar da aikin.

Maudu'ai Masu Alaƙa:

Gwamnatin Kano ta fitar da maƙudan kuɗaɗe saboda wasu muhimman ayyuka Kotun ɗaukaka ƙara ta tsige Abba Kabir daga gwamna Gwamnan Kano Abba Kabir ya tafi Kotun Ƙoli bayan hukuncin kotun ɗaukaka ƙara Gwamnatin Kano za ta biya diyyar biliyan 3 ga ƴan kasuwar da aka rushe wa shaguna