APC ta dakatar da shugabanta na ƙasa bisa zargin cin hanci da rashawa

Daga Sabiu Abdullahi

An dakatar da Dr. Abdullahi Umar Ganduje, shugaban jam’iyyar APC na kasa, daga shiyyarsa ta jihar Kano bisa zargin cin hanci da rashawa.

Jami’an zartarwa na gundumar Ganduje da ke karamar hukumar Dawakin-Tofa a jihar Kano ne suka bayyana hakan a ranar Litinin.

Haladu Gwanjo, mashawarcin bangaren shari’a na Unguwar, wanda ya yi wa manema labarai jawabi a babban birnin jihar, ya ce ana zargin tsohon Gwamnan Kano da aikata muguwar dabi’a da almubazzaranci da dukiyar al’umma a lokacin gwamnatinsa a Kano.

Gwanjo ya ci gaba da bayyana cewa, dakatarwar da aka yi wa Gandujen ta  biyo bayan kada kuri’ar rashin amincewa da shi ne.

An yanke wannan hukuncin ne saboda gazawarsa wajen wanke kansa daga zarge-zargen cin hanci da rashawa, musamman faifan bidiyon da ake yadawa da ke nuna yana karbar daloli a matsayin cin hanci daga wani dan kwangila.

Dakatar da Ganduje, wanda fitaccen jigo ne a cikin jam’iyyar APC, ya nuna aniyar jam’iyyar na magance zarge-zargen cin hanci da rashawa.

Maudu'ai Masu Alaƙa:

Ganduje Ya Zama Shugaban APC Na Ƙasa Sarkin Musulmi ya yaba wa matashin da ya tsinci maƙudan kuɗi kuma ya mayar wa mai shi a Kano Kotun ɗaukaka ƙara ta tsige Abba Kabir daga gwamna Ƴan sanda sun bankaɗo yunƙurin tayar da hankali bayan yanke hukuncin zaɓen gwamna a Kano