An ba da belin ƙananan yaran da aka kama lokacin zanga-zangar #EndBadGovernance a Kano

Daga Sabiu Abdullahi   

An bayar da belin wasu yara kanana da aka kama yayin zanga-zangar #BadBadGovernanceInNigeria a kwanakin baya a jihar Kano.   

Kamar yadda rahotanni suka ruwaito, wata kungiya mai suna Advocate for Justice Alliance, karkashin jagorancin Barista AK Musa ta yi nasarar sanyawa a saki yaran.   

A baya dai rundunar ‘yan sandan jihar Kano ta sanar da kama mutane 873 da ake zargi da aikata laifuka daban-daban a yayin zanga-zangar, inda daga bisani aka gurfanar da su a gaban alkalai tare da tsare su a gidajen yari daban-daban.   

Barista AK Musa ya tabbatar da sakin yaran, inda ya bayyana cewa, ‘’yan yara 40 ne aka bayar da belinsu daga gidan yarin Kano, babu wani babba da aka bayar da belinsa.”   

Ya kara da cewa za a ci gaba da wannan al’amari a ranar 11 ga watan Satumba, 2024, kuma kungiyarsa tana aiki da hukumar bayar da agaji ta jihar Kano domin ganin an sako wasu.   

Kamen dai wani bangare ne na murkushe masu zanga-zangar da ke neman a warware matsalar hauhawar farashin kayayyaki a Najeriya da kuma rashin tsaro da ake ci gaba da fuskanta. 

Maudu'ai Masu Alaƙa:

Gwamnatin Najeriya ta yi afuwa wa fursunoni a Kano Wata Baturiya ta haddace Alkur’ani a Kano   Abba da Gawuna: Malamai sun yi kira ga Kotun Ƙoli da ta yi adalci a shari’ar zaɓen gwamna Satar yara: Gwamnan Bauchi ya shawarci iyaye da su sanya ido kan ƴaƴansu